أنا مش كافر يا أمي السيناريست جرجس ثروت

أنا مش كافر يا أمي ياللى بتكفرنى مابلاقى شئ عن قرفك يصبرني وكأني جيت من كوكب تانى !!! ولا دي أرضى ولا دا مكاني !!! مع أنى صاحب وطن وهنا أتدفن أجدادي وهيموتوا أحفادي ودي غصب عنك بلادي..أما أعتقادى اللي أنت جاهل بيه ولا بتحاول تفهمه فدا أزلي وهيفضل أبدى ودا مقصدي ومرادي..وأن كان على الكفر برضوا هكفرك وأصرخ في كل وادي يا جدي آمون أنا أبنك الموحد بتذل في بلادي..أطلب معونة دولية ولا بالجهاد ضد عدوى اللي بيكرهنى أنادى لكن لا دي وصيتك يا سيدي ولا دا طبع أجدادي..بس برضوا صبري نفذ على الكره والجهل وغباء حضارات صحروات جات لبلادي..وأن كان على الرحيل يرحل اللي بالتكفير بينادى..أما أنا صاحب الأرض والوطن مش هأرحل ولا اسيب بلادي وهفضل أنادى بإيماني وبعلوا الصوت أعلنه وهعلموا لأولادى..والوطن اللي عاوز يستمر عمار يقبل الكل عليه بدون تفرقة وعلى أساس حقوق الإنسان ومبادئ تكون الحياة مش حد يعظم نفسه ويقتل ويفجر ويسيل الدم في الوادي..فوقى يا مصر وشوفي اللى عاوزين خرابك وبيدفعوا بالمليارات لهلاكك..وعشان شعوبهم الحمقى بالتعظيم لأنظمتهم تنادى ويقولوا عاشت بلادي ولا نقوم بثورة ولا نخلع ملك ببنوتنا بينادى..لكن شعبك الحر يا بلادي أذكى من الكل وطول عمرنا أصحاب حضارة وحتى لو كوم تراب بقيتي هتصرخى بالمدنية وتنادى..والعار والخزي على عشاق العبودية والقهر ودول عمرهم ما كانوا مصريين ولا من أولاد بلادي ..صعبان عليا يا بلدي وارض جدي وولدي لما يتطاول عليا كل من هب ودب ويكفرني في بلادي .. اللي لا يوم فيها اتنصفت ولا هناء شفت وبشكر ربى واصرخ بالسلام وأنادى وأقوله أنت وعدتنا بالبركة والخير يملئ كل أكمة ووادى..ومهما يحصل أرفع عيني عشان مصدق وعده أنه بالبركة مبارك بلادي..وكل الخزاين برا عمرت من خير بلادي وهربها خاين ولص وسرق قوت اولادى ومع كل دا سر البركة موجود ولسه فيها كسرة عيش طرية ولقمة هنية مع إن بالآلاف الحرامية..واللي مش مصدقنى أن القبطي سر البركة في مصر يجى يوم الأحد يشوف صلاتي في قداسي وأنا بصلي من أجل الطير والشجر والخيل حتى الجند والرئيس واللي ياما شفنا على أيديهم أمور كتيرة منها الردى والنجيس ومع ذلك بنغفر ونصلى بطول العمر والسلام لكل شخص في منصب ورئيس..نعمل إيه أكتر من كدا ؟؟؟ عشان بكرامة على أرضنا نعيش ؟؟؟ يا بلادي طول عمرك بلاد الخير والسلام والمحبة وفى خيرك الناس تعيش ولا عرفتى يوم شر وكنت بتطردى وتسحقي الخبيث وشعبك طول عمره بالخير والسمرة اللي في أيديه وعرقه بريحته الذكية وهو يعزق بفأسه بشرف في أرضه مثل يعلم كيف الناس تعيش..شافوكى ست الحسن ونموذج ومثال وقمت خلعتي الطغاة..حسدوكى على الفرحة يا عروسة النيل يا مزينة بجمالك وحسنك ومنورة الفستان وحتى الطرحة..قالوا لا !!! وحلفوا بكل ردى ونجيس لازم يهدوكى ولهلاكك صاروا رسل شر وخراب وبيدقوا ويلهثوا على كل باب يمكنهم من دا الخراب..لكن وبعد مايصرفوا فلوسهم ما راح ينجوا من عذاب..لأنك في عمارك عمار وإذا يوم ضعفت وسقطت كان على الأمم الجاهلة دي بكاملها الخراب..وأنت طول عمرك عروس المنطقة ذيديهم غيظ في حقدهم عذاب وقومي أنا واثق انك قوية ومع أنى شايف الدم بينزف من جروحك بغزارة وقوة لكن أنت يا أمي طول عمرك قوية..مش عاوز أبكى عليكى ولا فيكى اقبل عزاء من أبن وليه يجى شمتان ويقدم عطية..دا أنت طول عمرك صاحبة خير وياما أكلتى وكنت ليهم عزبة وتكية..ومع أن لينا عندهم كتير لكن بشرفك ولدك الحر حتى لو مات من الجوع ما يمد أيده ويقبل نجاسة شعوب ولو كان مال قارون..والكل عارف طبع الردى أنه من شهوته للسلطة والمال مغلوب..وقلنا كتير يمكن يتوب لكن حب يمشى بالمقلوب وكمان لسانه بقى يحدف علينا طوب ويقول ويعيد ويزيد وهو سعيد..لكن برضوا مهما حصل وجرى وكان هيجى يوم قريب فيه بسلطان تسحقي كل ردى وتابع جان وترجعي أمي الطاهرة عشق النفوس والقلوب اللي بيشتاق ليها اولادها فى كل مكان وعن عشقها ما في حد يقدر يتوب ..أغسلى توبك وأفردي شعرك الحريرعلى ضفاف النيل ووريهم جمالك وكيديهم بحسنك الفتان..وهما أما يموتوا من غيظهم أو يموتوا من الجنان عشان ولا فيهم شريف ولا حتى إنسان..ولو ما أنتفضتى وسمعتى صرختى يامصر يابلادى وبقيتى على الحال دا لا هيفضل فيك أخضر ولا يابس من شر الناس دي اللي بخرافات بتنادى .

أنا مسيحي مصري بحب كل الناس لأن الله محبة

أنا القبطي

انا قبطي عمرى ما كنت جبان

 لا باخاف من سلفي ولا اخوان

ولاخايف من ناس خايبه قالوا هنخطف النسوان

اللى مش لابسه نقاب ومخبيه عنيها كمان

ولا خايف من ناس جاهله

اقاموا الحد وقطعوا لواحد قبطى ودان

ولا خايف من ناس الحقد مالى قلوبهم  وبيحركهم الشيطان

راحوا و هدوا كنيسة صول اطفيح اللى فى حلوان

ولا خايف من جيش راح يضرب فى الدير ويهدد الرهبان

ده الهنا هو اللى حامينا ومالى قلوبنا بالايمان

و حقوقنا دايما بيرجعها  لينا

 وأسالوا فين العادلى ومبارك واسالوا فين ماما سوزان

وانا مصرى ودى بلدى

 مش بمزاج الشيخ يعقوب ولا الشيخ محمد حسان

ومش عايز تأشيره لكندا ولا لبلاد الامريكان

وبلدى مش ممكن اسيبها حتى لوفيها نمت جعان

ولا هادفع جزيه للشيخ عبود ولاهاسمع لكلام الهذيان

ولادقنى ها اصبغها حنه واربيها زى الافغان

والماده الثانيه مابتخوفنيش

الدستور ده  كله كلام مكتوب بايدين الانسان

وانا عمرى ماكنت مستنى حمايه

من امريكا ولا اوربا ولا اى بلد من البلدان

وانا اول واحد قلت لا للظلم ولاللطغيان

لما قتلوا اخواتى فى نجع حمادى

والعمرانيه والكشح و البدرمان

وانا ايدى كانت فى ايدين اخويا المسلم واحنا بنهتف فى الميدان

وانا صبيت له الميه يتوضى ويقوم يرفع الاذان

وهوحمانى لما كنت باصلى القداس وباقول اجمل الالحان

 وبنهتف مصر دى وطننا جميعا اما الدين للديان

مصر هتبقى دوله مدنيه ومافيش حد يتاجر بالأديان

مصر هتفضل وحده واحده مش راح تتقسم زى السودان

ومش ممكن نبقى يا امريكاعراق تانيه ولا افغانستان

ومش ممكن نبقى دوله دينيه زى السعوديه ولا ايران

مصر ده وطن بيعيش فينا مش بس شوارع و  حيطان

مصر الرب باركها وذكرها فى الانجيل وكمان فى القران

 والرب الهنا وعدنا انه ناقشنا على كف ايديه وهو حامينا لنهاية الازمان

واللى يمسنا هيمس حدقة عينه

واكيدعلى افعاله هيصبح ندمان

والهنا علمنا نحب كل الناس حتى الاعداء واللى بيئذينا كمان

 انما خوف انا ماباخافشى علشان انا قبطى وعمرى ما كنت جبان

ياجماعة أنا مصري, لكني مسيحي هل هذا يقلل من مصريتي, هل يسؤؤني اني مسيحي

ياجماعة أنا مصري, لكني مسيحي هل هذا يقلل من مصريتي, هل يسؤؤني اني مسيحي بالولادة ومسيحي أيضا بالأيمان,  أنا يشرفني أنضم لصفحتكم حسيت بثورتكم اني مصري كامل لا يعيبني أني مسيحي (ذي ماأنتم شايفين أسمي صبري بطرس أسم مشترك أهلى سموني كده عشان أدارى وسطكم وماأتعرفش اني مسيحي, لكن أسم جدي الرابع بيفضحني لأن الأوراق بتتطلب الأسم لغاية الجد التالت مش عارف ليه معاي أنا مطلوب مني ذكر الجد الرابع , فأضطريت أني أكشفه للجميع وأجاهر به لكل أنسان حتى أني سميت أولادي أسماء مسيحية واضحة مابدهاش بئه هيعملوا ايه أكتر من اللي بيعملوه مش فاضل غير أنهم يقتلوني مع أنهم بيخنقوني لكني مازلت أعيش بس عملية التنفس فيها خنقة), يمكن انا جيت متأخر أكتب لثورتكم ياشباب, لكن أنا بتابعكم من بداية الثورة, بتابعكم برضاي أو غصب عني, ده العالم كله بيتابعكم ومبهور بيكم, أنا عاوز أشكركم كلكم عاوز أشكر كل واحد فيكم فرد فرد, ونفسي أشوف كل واحد فيكم أبوس أيده, يمكن أنا أكبر من والد أي واحد فيكم في السن, لكني فخور بما عملتوه واللي أنا وجيلي كنا نحلم بيه ونبعده عن خاطرنا لأنه مستحيل, أنا سعيد بكم وفرحان ولكني خايف وحاسس ان الثورة بتتسرق من شوية حرامية محترفة, أنا بأقول لأ بأعلى صوت للتعديلات الدستورية, مش عاوز أخسر الحرية اللي أكتسبتها بفضلكم, أنا مش بحلم بس بألغاء المادة الثانية من الدستور, أنا بأحلم بألغاء خانة الديانة من المستندات كلها, أنا مش عاوز الرئاسة لواحد من المصريين, أنا بأحلم أن كرسي الرئاسة يكون متاح لكل المصريين, الكرسي ده يجب أن يكون كرسي خدمة وليس كرسي فرعون والشعب هم العبيد والخدامين له, مش عاوز أحس تاني أني مصري بس للأسف مسيحي, عاوز أستمر أحس أني مصري وبس مصري ذي وذيك وذي أي واحد في البلد,  أرجوكم أحموا ثورتكم من السرقة لاتتركوا ثورتكم للحرامية
صبري بطرس