الأحد، 30 نوفمبر، 2014

توضيح الواضح


مع الأسف كثير منا وصل لمرحلة متأخرة جداً من الجهل و الأنحدار الثقافي بشكل غير مسبوق ....الناس بقيت بكل أسف فاقدة للمنطق ....كل حاجة مخلوطة ببعض و كله داخل في بعضه....ترديد أي كلام و يصدقوه .....حياه بقيت شعارات و كلام فارغ ...أي كلام في أي كلام ....


يا جماعة .....خلينا نوضح الواضح ....معلش .
١- براءة مبارك ليس معناها أن عصر مبارك كان رائع و جميل .. البراءة دي لتهمة معينة و محددة هي "قتل المتظاهرين" ...كونك أنت رابط الحكم بفترة حكم مبارك دي مشكلتك أنت لوحدك ....و علي فكرة هو خد حكم في قضية تانية!!!

٢- علي فكرة براءة مبارك لا تعني عودة نظام مبارك .....لأن نظام مبارك أصلاً كله برة و قاعدين في بيوتهم من ساعتها .....في دولة حالياً و رئيس منتخب و كدة ....مبارك مش راجع ...زي مرسي كدة!!

٣- القضاء لو كان مسيس زي ما بنسمع ...كان أدان مبارك و حبيب العادلي لأنه في مصلحة الدولة الحكم على مبارك ....و لكن البراءة في مصلحة الأخوان و ضد الدولة ....ودي فرصة الأخوان ليثيروا الشعب ضد الحاكم ....فبلاش كلام فارغ!!!

٤- بالنسبة للأخوان الي بيتهموا السيسي أنه السبب في البراءة ....ده بالضبط غش وخداع وتدليس .....هو أنتم نسيتم مبارك أتقبل النقض بتاعه و خرج من السجن في عهد مرسي و النائب العام الملاكي الي عينه الأخوان و لا ايه؟ نسيتم؟!!!!

٥- حضرتكم لسه عايشين في عصر اللا دولة و الناس نازلة تتظاهر ضد الحكم ....يا جماعة في دولة موجودة دولة لها قضاء مستقل بذاته دون تدخل أو تأثير....مفيش حاجة اسمها أعتراض علي حكم قضائي....مش بمزاجك و لا بمزاجي ....ده حكم قضائي ....مش عاجبك الحكم؟ عاوز ايه؟ نلغي القضاء ونعمل محاكم ثورة و نلغي الدولة و القانون و الدستور .....و نخلي سيادتك تصدر الحكم الي يريحك ويرضيك بدون ضوابط قانونية؟....

٦- هو ليه حالة الأعتراض المبالغ فيها من الحكم ......هو مين كان متوقع حكم غير البراءة .....ما كلنا كنا عارفين و شوفنا الفيديوهات الي عرضها المحاميين و شوفنا بعينينا الأقسام و هي بتقتحم ...و سمعنا مكالمات الأخوان مع حماس للتخطيط ل٢٨ يناير ..و عارفين أنهم حطوا قناصة في التحرير .....ليه لا مؤاخدة "بنستهبل؟!!!" القصة كلها واضحة وزي الشمس ...مش مقتنع أنت حر بس لا تعيش دور أنك مصدوم و كأنك مش عارف الحكم من قبلها يعني!!

٧- الناس الي بتعيط أن الحكم يعني "فشل الثورة" .....طب لما الحكم الأول صدر بالأدانة مسمعناش صوت حضرتك ليه و أنت بتقول "الثورة نجحت" ....القصة كلها أستغلال و تجارة وتهليل ناحية مصالح جماعات بعينها ...فعلاً قرف!!

٨- سؤال ...هو حضرتك أستغربت من حكم البراءة و مستغربتش أن جمال و علاء بيتحاكموا في قضية قتل المتظاهرين الي ملهومش أي علاقة بيها؟ مستغربتش مثلاً أن مبارك بيتحاكم في قضايا هبلة زي هدايا الأهرام و قصور الرئاسة ؟
يا سيدي مبارك خد براءة أنه أتحاكم علي قضايا قدمت غلط .....كان المفروض قضية مبارك الأساسية تكون هي أستغلال الوظيفة لصالحه الأقتصادي والأهمال في تحسين أحوال الشعب وهذا نتج عنه فساد أجتماعي وأخلاقي و ثقافي واقتصادي وأمني .....

٩- لما بنقول أن ٢٨ يناير كانت مؤامرة أخوانية لأحداث أنفلات أمني ....ده لا يعني أن مبارك كويس ...اه والله ....و كمان مش المقصود بيه أن الشرطة كانت حلوة ....اه والله ....المقصود هو ما تعنيه الجملة لفظياً ...."٢٨ يناير مؤامرة أخوانجية لأحداث أنفلات أمني" .......أنت بقي فهمت حاجات تانية و أستنتجت أن كدة تبقي ثورة 25 يناير مؤامرة و أن مبارك كويس و الشرطة حلوة ...دي مشكلتك الي مع الأسف مبارك السبب فيها أنه وصل مستواك الفكري و الثقافي لهذا الأنحدار و التأخر .... أنما كانت هناك ثورة شريفة يوم 25يناير أنتهت يوم 28يناير بعد أن خطفت من القتلة المجرمين الأخوان المسلمين وأعوانهم من حماس..... كلام واضح أتقال ألاف المرات حتى أيام حكم مرسي ومعروف للجميع

١٠- علي فكرة السيسي مالوش دعوة بالقضية اه والله .......أصلاً القضية بدأت في عهد المجلس العسكري ....و النقد أتقبل في عهد مرسي و أتحددت المحكمة في عهد مرسي برضه ..و الجزء الكبير من المحاكمة في عهد عدلي منصور .....يعني السيسي مالوش دعوة ....أحسن في ناس فاكرة أن السيسي بيوالس مع مبارك....ناسيين أن السيسي هو رئيس الجمهوية دلوفتي ...اه والله!!!!
وأن السيسي رجل قوي شريف لا يخشى سوى الله وعدم تدخله في أحكام القضاء ليكون الحكم في صالح الهدوء وفي صالح عدم الغضب على الحاكم هذا في حد ذاته يشكر عليه ويجعلني أنعم بالطمأنينة أن هناك عدالة بدون تأثير من الحاكم 
يجب عليك عدم نقد أحكام القضاء سواء بالتأييد أو بالأعتراض لو كنتم تريدون العدالة فقط مهما كانت في صالح أهوائك او ضدها

ليست هناك تعليقات: