الجمعة، 12 يونيو، 2015

150سنة الاخيرة من تاريخ مصر

5 يونيو 2015 - ذكري النكسة
ايه التاريخ قبل حكاية النكسة دي
وازاي وصلنا للنكسة
تعالوا نشوف
--------
الموضوع بدا سنة 1859
فرنسا ومصر بيحفروا قناة السويس
---------
بعدها بعشر سنين
سنة 1869
افتتح الخديوي اسماعيل القناة
--------------
يعني حفرنا حوالي 200 كيلو بالمقاطف في عشر سنين
يعني عشرين كيلو في السنة
بالمقاطف
ما علينا
---------------
المهم فرنسا خدت امتياز شراكة مصر في القناة لمدة 99 سنة
يعني يخلصوا سنة 1968
لحد كده ماشي
-------------
ايه علاقة ده بالنكسة
يا عم اصبر
----------------
المهم فرنسا موجودة معانا ليه
عشان حقوق ليها في القناة وديون وحاجات زي كده
ما هو اسماعيل اتفشخر فشخرة السنين في حفل افتتاح القناة بنى الاوبرا ومنطقة الازبكية وعمارات شارع الازبكية اللي اصبح شارع 26 يوليو بعد الثورة وغير من شكل مصر لتصبح واحدة مثلها مثل اي مدينة اوربية
وكله بالديون طبعا
-------------
زي محطات الكهربا اللي بالديون قبل زيارة المانيا
وصفقات السلاح اللي بالديون قبل زيارة فرنسا
الدعم الدولي ده مش سهل يا جماعة
محتاج دماغ
--------------
المهم ديون بديون جات مصر عرضت نصيبها في القناة للبيع
عرف بالخبر سفير انجلترا في مصر
فمن غير ما يستشير الملكة
اشتري حصة مصر من القناة
كانت تقريبا بعشرين مليون جنيه استرليني
------------
وبعدين السفير اللي ما استشارش الملكة بتاعته
راح انجلترا ودخل علي الملكة ومعاه عقد ملكية انجلترا لنصيب مصر في القناة
وقال لها يا مولاتي لقد اشتريت لانجلترا حصة مصر في قناة السويس
--------------
لك ان تتخيل الموضوع ده كانت ايه عظمته
العظمة اللي تخليه ما يستناش ياخد راي الملكة قبل الشراء
خوفا علي ان حد تاني يشتري نصيب مصر
---------------
طب وده ايه علاقته بنكسة 67
يا عم الحاج اصبر
------------
المهم بقت انجلترا وفرنسا هما اصحاب القناة
او اصحاب الامتياز اللي هيخلص سنة 1968
--------------
جه الملك فؤاد الأوّل سدد ديون انجلترا وفرنسا في التلاتينات
واتفقوا انهم يسيبوا الموظفين بتوعهم يشغلوا القناة
الملك فؤاد ده ابو فاروق
عشان كده فاروق لما جاله ولد سماه فؤاد الثاني
والملك فؤاد ده اللي اتسمت باسمه جامعة القاهرة وفريق الزمالك
------------
ما علينا
المهم الراجل ده سدد ديون القناة
فبقت بتاعتنا خلاص
كل ما في الامر انها بتدار بموظفين اجانب
-------------
طب وده ماله ومال نكسة 67
يا عم ما تصبر جايلك اهو
----------------
عبد الناصر لما مسك الحكم حب يعمل مشروع يشد بيه مجهود المصريين وانتباههم
فقلب في الدفاتر القديمة فلقي مشروع سد علي النيل
كانت اقترحته وزارة الري في التلاتينات تقريبا
-------------
فقال هوا ده
اسماعيل عمل القناة وانا هعمل السد
هوا ده المشروع اللي هيبقي الانجاز القومي في عصري
موسوعة جينيس مش هتلاحق علي الارقام اللي فيه
------------
بالمناسبة كان فيه خزان اسوان قبل السد العالي
ده سد بنوه الانجليز سنة 1900 تقريبا
وموجود لسه لحد دلوقتي انا شفته في اسوان
--------------
وكانت الاقتراحات ساعتها الهندسية كتير لمكان انشاء السد
الا ان عبد الناصر حكّم رايه اننا نبنيه في اسوان
-------------
يا عم الحاج يهديك يرضيك
قام متربس دماغه وساجن المعارضين لمكان السد
ونقل عميد هندسة القاهرة من منصبه
الي ادارة احد فروع محلات باتا لبيع الاحذية
لانه عارض مكان اقامة السد
---------------
كان فيه اقتراحات لاماكن تانية غير اسوان ذات جدوي من نواحي متعدة
وكانت فيه اعتراضات ذات وجاهة علي مكان السد في اسوان
------------
المهم عبد الناصر عجبه موضوع اسوان ده فخلاص انتهينا
ده رئيس عنده رؤيه
----------
وبعدين أبو رؤية ميل علي عثمان احمد عثمان
قال له معقول ما عندناش حد يقدر يحط خلطة الخرسانة بتاعة السد
فعثمان احمد عثمان قال له بخوف كده
فيه اتنين بس اخوان ومسجونين
فعبد الناصر طلع الاتنين دول من السجن
خلصوا معاه المشروع
وسجنهم بعدها تاني
-------------------
لحد كده تمام
تمام
طب و 67
يا عم اصبر
قربنا آهو
----------------
ما هو لو مانتاش عارف الحكاية من البداية
عمرك ما هتفهم احنا اتفشخنا الفشخة دي ازاي في 6 ساعات
---------------
المهم
عبد الناصر كان زعيم
مش قائد
زعيم
-------------
القائد ده هوا القائد جوا بلده
الزعيم زعيم علي المنطقة العربية والافريقية وكمان راح لأسيا
فعبد الناصر كان عاوز يبقي زعيم علي العالم الجديد المتحرر من الاستعمار والواقع تحت الاستعمار يساعده على التحرر والدول الملكية والدول المعارضه له يعمل بها انقلابات لتكون جمهورية وتحت قيادته
-------------
مين بينافسه في الوقت ده
السعودية
عبد الناصر يرتكز علي ان بلده هيا الرائدة علميا وعسكريا واجتماعيا
والسعودية ترتكز علي انها مهبط الوحي وارض الرسالة
فيجب ان تكون هي مقر الزعامة
-----------------
عبد الناصر دعم دولة زي الجزائر مثلا
قامت السعودية دعمت ثوار في اليمن علي الحاكم اللي كان بيحكم ساعتها
----------------
فعبد الناصر حس ان دور السعودية بيكبر في المنطقة
قام باعت نص جيشه يحاربوا الثوار دول مع رئيس اليمن اللي كان موجود ساعتها
قامت السعودية باعته دعم عسكري للثوار
----------------
وفضل الرئيس اليمني والثوار يحاربوا بعض وجها لوجه
بينما وراء الكواليس مصر والسعودية هما اللي بيحاربوا بعض
المهم نص الجيش المصري كان في اليمن
من الفترة من 1962 ل 1967
لحد ما قامت حرب 1967 ونص جيشنا بره
--------------------
قربنا اهو ل 67
نرجع بقي للسد العالي
علي فكرة السد العالي في نفس الحقبة الزمنية
من 1960 ل 1970
بس احنا لسه قبلها بشويه
لسه ما وصلناش ل 1960 وبداية بناء السد العالي
احنا بنتكلم في المقدمات
---------------
جه البنك الدولي قال مش مساعد مصر في مصاريف انشاء السد العالي
تعمل ايه يا واد يا عبد الناصر تعمل ايه
راح روسيا
كنا احنا جايبين صفقة سلاح من الاتحاد السوفييتي سنة 1955 ساعتها
وكانت الدنيا عسل مع روسيا
----------------
وروسيا في حرب بارده مع امريكا
وكل واحدة بتستقطب دول صغيرة معاها
فروسيا امدتنا بتلت تمويل السد العالي
وبتلت العمالة المطلوبة لانشاءه
----------------
بس شكلها كده ما فيهوش اكشن
تحس ان الموضوع محتاج شويه سابسنس
هو دايما يحب يكون محور حديث واهتمام العالم
قام عبد الناصر قال هأمّم القناة
--------------
هيا اساسا كانت بتاعة مصر من سنة 1935
وكان امتياز القناة اللي بقي امتياز ادارة فقط هينتهي سنة 1968
المهم هيا كبرت في دماغ عبد الناصر
قبل ما الامتياز يخلص
انه يامم القناة سنة 1956
فقام مأمّم القناة
وخلاص
---------------
طب وردود الفعل هل حسبتها
يا عم صلّ علي اللي هيشفع فيك
ردود فعل ايه
يرزعوا دماغهم في الحيط
------------------
فانجلترا وفرنسا بدل ما يرزعوا دماغهم في الحيطة
قاموا جايبين جيوشهم ومحتلين القناة
-------------
الفكاكة العسكرية ساعتها تقول ايه
تقول نسحب جيشنا من سينا ومن منطقة القناة في الوقت ده
-----------------
ليه
عشان العساكر ما تتعورش
يا حنين
نفسي اترمي في حضنك واعيط
--------------
فقام عبد الناصر وعبد الحكيم عامر ساحبين الجيش من سينا ومن القناة
سينا بقيت فاضية
اسرائيل قامت داخلة قاعدة في سينا ومستربعة
---------------
انجلترا وفرنسا قالت لها علي وضعك كده
هما مش عاوزين سينا
هما عاوزين القناة
فخلاص
--------------
انجلترا وفرنسا في القناة
واسرائيل في سينا
واحنا سحبنا الجيش
وفيه مقاومة شعبية في القناة بتغتال عسكري انجليزي بمسدس ولا حاجة
وخلاص
---------------
خلاص ؟!
لا طبعا مش خلاص
الحرب العالمية التانية خلصت 1945
نتيجة الحرب دي ان امريكا وروسيا بقم هما اسياد العالم الجداد
وراحت خلاص علي انجلترا وفرنسا
------------
خلاص
كان زمان يا جوني
كان زمان يا فرانك
آنكل سام هوّا اللي بيحكم دلوقتي
تيجوا انتوا تقعدوا في القناة
وتقولوا للسفن بتاعة امريكا وروسيا دي تعدي ودي ما تعديش
طب عليّا الترترترترترتبتيت لو ما طلعتوا من القناة لنفرتككوا فيها
---------------
امريكا اعلنت تحذيرها لانجلترا وفرنسا
يقال ان الاسلحة النووية وضعت علي وضع الاستعداد
لضرب قوات انجلترا وفرنسا في القناة
------------
قامت انجلترا وفرنسا قايلين لهم
لا وعلي ايه
لم يا عم عزالك منك ليه
وسابوا القناة ومشيوا
------------
طب واسرائيل قالت لهم وانا بنت الغسالة يعني
قالولها خلاص دي كانت حركة كده وفشلت
وانتي ارجعي حدودك تاني
قالت ماشي بس بشرطين
-------------
ايه الشرطين
اولا تحطوا قوات حفظ سلام بيني وبين المصريين دول
بدل ما حد منهم يعدي الحدود ويتفرج عليا وانا باستحمي ولا حاجة
وانتوا عارفين ان انا باتكسف
قالولها ماشي
---------------
وايه الشرط التاني كمان
قالت اخد حق الملاحة في خليج العقبة
من سنة 1948 ل 1956 كان اسرائيل مش من حقها تبحر في خليج العقبة
وطبعا مش هنعديها من قناة السويس
فكده نص العالم الشرقي كله ممنوع علي اسرائيل للتجارة
-----------------
فلما اسرائيل هتاخد حق الملاحة في خليج العقبة
يبقي أخدت فرصتها ليكون لها مينا
------------------
جات الامم المتحدة قالت ماشي
نحط قوات حفظ سلام
واسرائيل تعدي من خليج العقبة
الكلام ده سنة 1956
وماشي علي كده وتمام قوي
----------------
سنة 1967 بقي
في بداية السنة كده
كبرت في دماغ عبد الناصر يمنع اسرائيل من المرور من مضيق تيران اللي بيقفل خليج العقبة من تحت
قصاد شرم الشيخ بالظبط
فيه جزيرة اسمها تيران وجزيرة صنافير
ودول بنقفل بيهم احنا كمصريين خليج العقبة من تحت
زي مضيق باب المندب كده ما بيقفل البحر الاحمر
---------------------
المهم هيا نونوت مع عبد الناصر يقفل مضيق تيران فقفله
وخلاص
وقام مجمع قادة الجيش عشان ياخد رايهم
طبعا لا هياخد رايهم ولا حاجة
هوا خد القرار وخلاص
ومش مستني راي منكم انتم يا بهايم علي راي عادل امام
---------------------
طبعا القيادة العسكرية عارفة ان نص الجيش في اليمن من سنة 1962
فلسه واحد هيفتح بقه ويقول له انا شايف
قال له شايف ايه يا حيوان
قال له شايف دبانه علي كتف سياتك وخايف لتضايق سعاتك
قال له آه باحسب
-------------
المهم القيادة كلها قالت له الراي رايك والشورة شورتك يا فندم
تقفل المضيق تفتح المضيق انتا حر
الكلام ده في بداية مايو 1967 كده
----------------------
طبعا اسرائيل الدنيا اتقلبت فيها
دي نص العالم الشرقي بتجارته هتضيع كده يا جدعان
----------------
اسرائيل قالت له انتا كده بتعلن الحرب علينا
قال لهم ايوه
باعلن الحرب
----------------
وانتوا يا قوات الامم المتحدة اللي بيننا وبين اسرائيل تلموا هدومكوا وتمشوا
عشان هتبقي مجزرة هنا وانتوا صغيرين وقطاقيط كده ومش قد الكلام ده
-----------------
فالامم المتحدة سحبت ولادها واستعدينا للحرب خلاص
قالوا عبد الناصر هيهدي ويلم الامور قال لهم لا انا باتكلم جد ومش بهزر
-----------------
كانت دفعة الجيش اللي هتنهي خدمتها في 1 / 6 / 1967
بتستعد لحاجة اسمها اجازة الرديف
15 يوم بدري كده بيلموا حاجتهم ويسلموا المخالي ويمشوا
كان فيهم ابو احد اصدقائي
-----------------
جات لهم التعليمات وهما بيسلموا المخالي
انه كل واحد يخليه في وحدته
وبالفعل الدفعة دي استنت 20 يوم والحرب بدات
-----------------
منهم اللي مات ومنهم اللي كمل لبعد 67
اللي كان مش متعلم سرّحوه
لانهم ابتدوا في فكرة تجنيد المتعلمين
والباقي سابوه ل 73
------------------
فيه ناس خدمت في الجيش 9 سنين
لدرجة انهم كانوا طالعين للحياة المدنية مش عارفين يشتغلوا ايه
ده غير اللي جاتله امراض نفسية وخلافه
------------------
المهم امريكا وروسيا هما كبارات العالم في الوقت ده
شافوا مصر واسرائيل بيحكوا في بعض
فقالولهم اللي هيبتدي الحرب منكوا هوا حر ما حدش فينا هيدعمه
----------------
قام عبد الناصر زي الطيب خالص كده
قام قافل علي الخطة الهجومية وطلع الخطة الدفاعية
--------------
الخطة الدفاعية دي بتقول سيب نفسك تتلقي الضربة
وبعدين رد علي العدو وطلعه من ارضك
---------------
ده عند ماما فهيمة طبعا
علي اساس ان العدو ده داخل يهزر
ده داخل يدبحك ويقطع ايديك ورجليك ويزرع نفسه هنا
هتطلعه ازاي
علي فكرة ام عبد الناصر اسمها فهيمة ومراته اسمها تحية
ما علينا
--------------------
المهم عبد الناصر شاف كده
نطبق الخطة الدفاعية
علي فكرة اكبر منصب شغله عبد الناصر كان مقدم
حتي الاذاعة البريطانية كانت دايما تقول البكباشي ناصر
استحقارا ليه
--------------
وعبد الحكيم عامر كان رائد او صاغ باسماء ايامها
وبعدين رقاه عمله لوا
وبعدين عمله مشير
ومسكه وزارة الدفاع
-----------------
فمرة عبد الناصر بيعرّف عامر لاحد القادة العسكريين الاجانب
فقال له بقدم لك المشير عامر
قام القائد الاجنبي ده قال له مشير ؟!
ايه المعارك اللي انتصرت فيها
طبعا ناصر وعامر بصوا لبعض وقالوله وماذا عن الأوس والخزرج
--------------
المهم الرائد والمقدم دول هما اللي هيقودوا الحرب
في حين ان اليهود كانوا مشكلين لواء مقاتل يهودي
مع الجيش الانجليزي في الحرب العالمية التانية
وكانوا هارسين ميادين الحروب كويس
-------------------
ده غير السلاح الفرنساوي اللي كان بيجيلهم
كانت امريكا لسه لا ترعي اسرائيل
بدات ترعاها بعد 1967 لما شافت فيها لاعب ناشئ قوي
استطاع هزيمة واحتلال اربع دول في يوم واحد
-----------------
اسرائيل قبل حرب 1967 بعتت مندوب لوزارة الدفاع الامريكية
تستاذن في بدء الحرب
كان الرد دبلوماسي
يعني كلام يحتمل المعنيين
------------------
المهم
عبد الناصر في اطار شحن قوة الجيش المصري
جاب رقاصة ومغني
وعملوا حفلة غنائية راقصة للفجر في قاعدة انشاص العسكرية
------------------
وكان المفروض عبد الحليم هيحضر بس حصل قلق فكلموه قالوله ما تجيش
المهم الحفلة دي كانت يوم 4 يونيو بالليل
وكان المفروض تخلص الساعة 3 او 4 الفجر
بس الظباط والطيارين كانوا منسجمين فالحفلة طولت ل 6 الصبح يوم 5 يونيو
ساعة الحظ ما تتعوضش يا فندم
--------------------
في الوقت ده كان عبد الحكيم عامر طاير بطيارة هيليكوبتر
ورايح مطار فايد يقابل بعض القادة العسكريين
لتدارس ما سيفعلونه في الحرب القادمة
----------------------
في حين ان الحرب ما كانتش قادمة ولا حاجة
دي كانت بدات بالفعل
لما كانت طيارة عامر طايرة
كانت التعليمات للمدفعية بايقاف اي ضرب
خوفا علي طائرة المشير
-------------------
المهم اسرائيل بدا ت الضرب
طارت فوق البحر المتوسط ودخلت من الغرب
في حين ان دفاعاتنا كانت موجهة للشرق
---------------
الخطة دي كان فيها من خطة 1956
ولما قالوا لموشي دايان ازاي تكرر حاجات من خطة 56
مش خايف ان العرب يكونوا استعدوا للتصدي للهجمات دي
قال لهم العرب لا يقرؤون
واذا قرؤوا لا يفهمون
----------------
الخطة دي كانت وضعت بين بعض القادة اليهود وهما بيدردشوا
فواحد منهم طلع علبة سجاير وقطعها ورسم الخطة
او الشكل العام للخطة يعني علي ورقة علبة السجاير
-----------------
في الوقت ده جات الاخبار للقيادة العسكرية اننا بنتضرب
فافتكروا بعض بيهزروا
بعد شويه جات الاخبار تاني
فواحد منهم قال ده بجد بقي
---------------------
المهم
عبد الناصر كان مجهز الخطة الدفاعية
قام راح قيادة الجيش
وقعد يدير الخطة اللوذعية بتاعته
نسيب اسرائيل تضربنا
وبعدين نطلعها
----------------
ليه
لان امريكا وروسيا قالت ان اللي هيبتدي الضرب مالناش دعوة بيه
واحنا طيبين طبعا ما بنبتديش الضرب
اصل حرام
----------------------
المهم عبد الناصر دخل مقر القيادة يوم 5 يونيو
وبدا ت الاخبار تتوالي اننا فاشخين اسرائيل شامي ومغربي في سينا
وشويه شويه هندخل تل ابيب
---------------
لحد يوم 8 يونيو ما قالوا خلاص كله راح كله اتدمر كله اتكسر
قام عبد الناصر جمع المواطنين الشرفاء في القهاوي
وطلع اعلن بيان التنحي
--------------------
المواطنين الشرفاء قالوا احا احا لا تتنحي
قال لهم خلاص طالما حلفتوا ماشي
وفضل في الحكم
ولبسنا نكسة 67
اللي تعتبر العامل الاساسي لتعجيز مصر لحد دلوقتي
-----------------
ارجو ما اكونش طولت عليكوا
او انا طولت فعلا
هههههههههههههههه
--------------------------
هوا التاريخ كده اذا ا كنتش تجيبه من كل نواحيه استحاله تفهمه
وفيه حاجات كتير ما ذكرتهاش خوفا من الاطالة بردو
-------------------------
اما المصادر
فهي مصادر متنوعة جمعتها علي مدار حوالي 10 سنوات من القراءة
فمستحيل اقدر اذكرها دلوقتي

ليست هناك تعليقات: