أنا بداخلى أحساس خبيث

ياجماعة أنا حاسس بأحساس خبيث كده ان المجلس العسكري لا يحب مصر ولا يحب المصريين, بل يريد لهم مستقبل أسود من الطين, حاسس أنه عاوز يدي البلد للأخوان ذي الشقة اوبن سبيس بدون تشطيب أو محارة أو عمدان حتى, عشان الأخوان تقسم فيها وتعمل ديكوراتها ومكان غرف النوم والحمام والسفرة وخلافه مطرح ما تحب وعلى حسب الأحوال, بمعنى لو جه الرئيس من الأخوان وطلع مرسي, يبقى جميل وزيتنا هيبقى من دقيقنا ومش محتاجين نعمل فواصل في الشقة وحوائط وممكن أودة النوم تفتح على الصالون وتفتح على الحمام كمان, لأن مافيش حد غريب, أما لو لا سمح الله وجه احمد شفيق بقيت الشقة ماتتسكنش بدون وضع فواصل وحوائط وممكن أسلاك شائكة, لأنه هيسكن معاهم وهياكل من مطبخ واحد, عشان كده لازم يفصلوا الشقة من جديد ويعملوا لأحمد أفندي شفيق يعملوا له أوضة صغيرة جنب باب الشقة بحمام صغير برضه, ويحولوا له مهام العزاء الرسمية أما باقي الشقة فتكون لهم بس مع الحرص في تقسيمها أنهم يجعلوا أوضة أحمد شفيق أبعد ماتكون عن المطبخ والحمام واوضة النوم بتاعتهم, لا يدخلها ولا حتى يمر عليها, عرفتوا ليه المجلس العسكري بيحقق أمل الأخوان وبيديهم الشقة بدون عمدان كتير يمكن عمود أو أتنين وكمان عاوزين يشيلوهم!!! الحقيقة أنا خايف لاحسن سقف الشقة يقع والشقة تتردم ولا نحصل شقة ولا حتى أوضة
إلى الأن لا يوجد دستور للبلد, والرئيس اللي جاي مش عارف هو هيعمل رئيس بأي طريقة وفين الأوضة اللي هينام فيها, وهياكل من الشارع ولا من مطبخ الشقة؟ والحمام؟ يانهار, ده أنا مافكرتش  لسه في حكاية الحمام دي يادي المصيبة