الجمعة، 23 مارس، 2012

جواز المجلس من اللجنة بااااااااااااااطل



بقلم إسعاد يونس

■ عقبالك يوم ميلادك لما تنول اللى شغل بالك يا قلبى.. تيرام تيرام.. وهابى بيرث داى تو يو.. طفى الشمعة يا حبيبتى يا غزوة الصناديق.. ما شاء الله كبرت وبقت حلوة كده.. بس متأخرة فى الكلام شوية.. ما بتعرفش تقول غير نحم نحم.. والظاهر الشر بره وبعيد عندها كساح باين.. مبطوطة مكانها من ساعة ما شرفت لا بتمشى ولا بتحبى حتى.. مستقرة عالأرض.. استقرار استقرار يعنى.. كل سنة وانتى طيبة يا غزوة.. يا رب يكون بابا اللى هللك لما جيتى مبسوط ومرتاح بعد ما بشر الأمة بالنحم نحم.. نعم الله عليك يا مشيهصنا بالاستقرار.
■ الحمدلله الذى لا يحمد على أى شىء سواه.. فلقد طال الانتظار والشوق والحنين واللوعة والسهاد.. أشياء دفعنا فيها الغالى والنفيس من سنة فاتت لكن أخيرا هانت وبانت الانفراجة.. ريّح العضمة يا شعب ونام على جنبك واتهنى فى فرشتك فلقد عرفنا أخيرا مين اللى حايكتب الداستور.
■ اعترض بقى يا شعب.. إذا كان حد بتساوره شكوك لا سمح الله نحب نفكركم بمنجزات السادة العظماء اللى حايسهروا الليالى يبلوا الريشة فى المحبرة ويخطوا الوثيقة اللى حاتحدد مصيرنا كلنا على جلد الغزال ويبعتهولنا بالحمام الزاجل على أسطح بيوتنا.
■ ده مجلسكم الموقر اللى اخترتوه بإيديكوا لا تكونوا ناسيين.. المجلس اللى معنى جداً وفى المقام الأول بعمل كل ما لا يخالف شرع الله.. مع التركيز على نسخة الترجمة باللغة الفارسية لشرع الله من وجهة نظرهم.. المجلس اللى بيدّنوا فيه محققين بذلك سابقة وتقدماً مذهلاً فى علم إدارة مثل هذه البرلمانات.. وانشاء الله وبعونه تعالى حايركبوا فيه الحاجة فاطمة اللى هو مدفع رمضان على رأى الفيسبوكاوية عشان يبقى إنجاز علمى مضاف.. المجلس اللى فيه عشرة بيتكلموا والباقى بيتلقوا الإشارة زغرا بالتصفيق الحاد يقوموا مصقفين على طول.. ناس مطيعة ومحترمة يؤمروا فيطيعوا بدون جدل ولا نقاش.. المجلس الذى سيرفع هامة العلم بحجب اللغات الأجنبية التى تأتى بالمفسدة وتحقق مؤامرات الصهاينة والأمريكان.. ويرى فى اللغة الإنجليزية «رجس» من عمل الشيطان.. المجلس اللى حايجيب لفنون الأداء والتمثيل الأوسكار بعون الله بعد الأداء المبهر لعايز حق ابنى اللى وحشنى متبوعا بفاصل من البكاء الجماعى.. المجلس المهموم بأمراض الشعب المستعصية.. مادية كانت أو صحية أو معيشية.. فيعملوا بكل طاقتهم على تبديد هذا التعب ورفع مستوى المواطن وذلك بمناقشة القوانين التى ستحقق ذلك.. وأهم حاجة واخد باله منها هى صحتنا التناسلية.. فيعلن أنه بصدد غلق المواقع الإباحية.. مع التيسير والتسهيل على المواطنين بخفض سعر قرص الفياجرا.. وهى من أوائل وأوليات ما يحتاجه الوطن المتناسل دوما بدون مكسبات للطعم والرائحة.. وتحقيقا للعدالة الاجتماعية.. أعتقد أن الخطوة القادمة ستكون دعم الدولة للفياجرا حتى يصبح القرص ببلاش كده.. بلا رغيف عيش بلا نيلة.
■ المجلس الداعم لحرية التعبير والتظاهر بكل قوته.. وسيتجلى ذلك فى مشروع قانون ينظم العملية.. اللى عايز يتظاهر يقدم طلب ويحجز رصيف فايف ستارز ويدفع داون بايمنت خمسة جنيه عالراس ويبلغ جميع السلطات التنفيذية والتشريعية والصحية والتموينية بأسماء المتظاهرين نفر نفر مع فيش وتشبيه وشجرة العيلة ونوايا الخطوبة والجواز عرفيا كان أو رسميا أو كده وكده لكل متظاهر على حدة.. مع ملى استمارة توضح أنواع الهتافات الموافق عليها رقابيا وبهورن وللا من غير هورن.. وكتالوج أزياء للمتظاهرين مراعاة لمنع الكباسين والكبش والحاجات اللى بتتزفلط.. وكل من سيخالف ذلك سيتعرض للحبس والمحاكمة العسكرية وكهربة الأطراف الحساسة والبليدة ويمكن يترمى ف صفايح الزبالة أسوة باللى قبله ويبقى حد يشيل الميتين اللى هنا.
■ المجلس اللى بعض أعضائه لا يقفون حدادا على رمز مصرى بكته الملايين وهو البابا شنودة الله يرحمه رحمة واسعة.. ويكون التبرير أن هذا مخالف لشريعتهم!!!.. التى اتضح أنها غير شريعة كل المصاروة بجميع أطيافهم.. يعنى فيه فرق فى السرعات.. وبناء عليه ستكون الخطوة التالية هى إجبار الكل عالجزء.
■ المجلس اللى أصحاب الأغلبية فيه مالهمش شغلانة غير التكالب عالكراسى والبحث عن شعبية بدأت تتساقط أوراقها كمثل أشجار الخريف.. والذى يتبع خطى الحزب الوطنى بالحرف فى كل عمايله السودة.. إلا أن التلميذ بليد حبتين.. مش بتقولوا بما لا يخالف شرع الله؟؟.. هو شرع الله بيقول إننا نتستر على التجار الذين يحصلون على المواد المدعومة مثل البنزين والسولار والبوتاجاز ويبيعونها بأضعاف ثمنها إلى البشر؟؟.. هل هناك مواطن يصل إليه هذا الدعم؟؟.. أو يشترى أمبوبة البوتاجاز بثمنها المدعوم؟؟ فرق السعر فى هذه المواد يذهب إلى جيب مين يا سادة؟؟.. فرقتوا إيه عن الوطنى؟؟.. كنا نظن أنكم ستأتون بعهد جديد وشكل أجدد.. طلعتوا قدام قوى.
■ الدكتور الكتاتنى.. الذى كنت أحترمه وأجل كفاحه قبل أن يجلس على الكرسى المخصوص.. هل تشترى أمبوبة البوتاجاز فى بيتك بالسعر المدعوم؟؟.. إذا كانت الإجابة بنعم.. فلماذا لا يشتريها الشعب بنفس الثمن؟؟.. وإذا كانت بلا فمسؤوليتك الأولى أن تبحث عمن يتستر على من لايزال يمارس هذا الجرم.. وإن كنتم تبحثون عن بطولة.. فتجرأوا وارفعوا الدعم عن هذه المواد.. فهذا الدعم يستنزف مال الدولة ومال المواطن بس.. ولا يحقق إلا الثروة للبهوات اللى موجودين من الأول ومعروفين وقدام قوى زيكم.
■ هذا هو المجلس الذى قرر عافية كده أن يكون من بين أعضائه خمسؤن بالمائة ممن سيكتبون الدستور.. وهو إجراء بااااااااااااااطل.. باااااااااااااطل.. طال الزمن أو قصر لن يقبل الناس هذا الإجراء الباااااااااااااااطل.. وإن كان أهل فؤادة كانوا رجالة.. فإحنا مش أقل منهم رجولة.
■ ملحوظة أخيرة.. هل خبر نية اجتماع حزب الأغلبية يومى السبت والأحد لاختيار مرشحهم الرئاسى حقيقى؟؟.. مش قلنا مش حانرشح حد؟؟؟.. هو مش اللى بيكذب بيروح النار؟؟؟؟؟؟؟؟؟؟؟؟؟؟؟

المصرى اليوم

ليست هناك تعليقات: